L-ewwel mużew nazzjonali ta’ arti kontemporanja f’Malta – il-Malta International Contemporary Art Space (MICAS) – ġie inawgurat nhar il-Ġimgħa, il-25 ta’ Ottubru 2024 b’wirja allegra u monumentali mill-artista Portugiża rinomata u viżjonarja, Joana Vasconcelos.

Il-MICAS infetaħ uffiċjalment mill-Prim Ministru Robert Abela flimkien ma’ Joana Vasconcelos, kif ukoll il-Ministru għall-Wirt Nazzjonali, l-Arti u l-Gvern Lokali, Owen Bonnici, u l-bord tal-MICAS immexxi mill-Kap Eżekuttiv, Phyllis Muscat.

Il-mistiedna speċjali għall-inawgurazzjoni uffiċjali tefgħu għajnejhom fuq tliet xogħlijiet ewlenin ta’ Joana Vasconcelos –Tree Of Life, Garden of Eden, u Valkyrie Mumbet – kif ukoll fuq serje ta’ xogħlijiet oħra, li letteralment ħadu l-erba’ sulari tal-MICAS.

Il-mistiedna ammiraw ukoll l-intervent arkitettoniku tal-fortifikazzjoni tas-seklu 17, li fi żmien il-Kavallieri kienet tilqa’ ġo fiha l-Ospizio, illum imdawra taħt grilja ikonika ta’ travi tal-azzar li jlaqqgħu flimkien il-Forti San Salvatur, l-arkata mxaqilba Barbara, u l-Bastjun La Victoria. Flimkien mal-arja kollha quddiem il-MICAS, ir-restawr tal-binjiet awżiljarji, ir-restawr tal-bastjuni, ir-residenzi għall-artisti u l-ġnien tal-iskultura, dan il-proġett huwa investiment statali ta’ €23 miljun, msaħħaħ b’aktar minn €9 miljuni f’finanzjament mill-ERDF.

Taħt it-tmexxija tal-bord tal-MICAS, dan il-kumpless ta’ binjiet storiċi li qabel ma kienx aċċessibbli, reġa’ nfetaħ mill-ġdid għall-komunità bħala d-destinazzjoni kulturali ġdida fjamanta ta’ Malta.

Il-Prim Ministru Robert Abela qal li l-ftuħ tal-MICAS kien mument trasformattiv għan-nazzjon Malti, u ta ġieħ kemm lill-imħuħ kif ukoll lill-ħaddiema kollha li taw il-frott lil dan il-kunċett.

“Il-MICAS jissimbolizza l-progress kollettiv ta’ dan il-pajjiż, u issa nemmen li huwa parti mill-qabża fil-kwalità li ksibna f’dawn l-aħħar snin, bi pjattaforma kulturali għall-arti, li tibgħat il-messaġġ tagħna ta’ fidi fl-artisti, li se jiddokumentaw l-istorja tagħna b’xogħolhom,” qal Abela.

“Bis-saħħa ta’ dan il-progress, Malta tista’ verament tkun ċentru għall-kreattività artistika fil-Mediterran, u dar naturali għall-artisti.”

Il-Kap Eżekuttiv tal-MICAS, Phyllis Muscat iddeskriviet l-evoluzzjoni tal-kunċett, li bdiet formalment fl-2018, biex twieġeb għal sejħiet ta’ deċennji sħaħ mill-artisti Maltin għal spazju għall-arti kontemporanja, u attribwixxiet l-isforzi tal-bord tal-MICAS għall-kuntatti li għamel mad-dinja tal-arti internazzjonali.

“Għalina kienet sfida li nippreżentaw dik li essenzjalment kienet entità fil-bidu tagħha, b’ebda storja jew binja sħiħa, u jerġa’ minn nazzjon mill-iżgħar… kien l-entużjażmu tagħna xprunana biex niżviluppaw dan il-kunċett u noħolqu interess fiċ-ċrieki ta’ arti internazzjonali, u ksibna dan b’mod konkret permezz tan-networks li ħloqna ma’ artisti, kuraturi, mużewijiet, fondazzjonijiet u storiċi tal-arti, kollha kemm huma internazzjonali, kif ukoll permezz tal-akkwisti li għamilna.”