Pierre Huyghe huwa wieħed mill-artisti l-aktar importanti li qed jaħdmu llum. Il-ħidma tiegħu qajmet mistoqsijiet dwar kważi kull aspett tal-ħolqien tal-arti u l-modi kif din titħabbel u tintiseġ mat-tfassil tal-wirjiet u ma’ kif tinbena l-istorja tal-arti. Dawk li jiltaqgħu max-xogħol tiegħu huma mogħtija indikazzjonijiet, tħeġġiġ u ħjilijiet biex isegwu l-ħsibijiet tiegħu jew jibdew il-perċezzjonijiet kontemplattivi tagħhom stess dwar id-dinja. Matul l-aħħar deċennju, il-prattika ta’ Huyghe għaddiet minn proċess ta’ migrazzjoni, dieħla u ħierġa mill-kuntesti u t-temporalitajiet tradizzjonali tal-arti, tidher barra minnhom daqskemm fihom. Fiż-żewġ tipi ta’ spazju, madankollu, Huyghe sab modi kif il-viżitaturi umani jinġiebu f’sett ta’ sistemi li jinkludu komunitajiet bijoloġiċi kif ukoll teknoloġiji, li jittrasformaw il-wirjiet li normalment ikunu statiċi f’organiżmi ħajjin. Dak li Huyghe jgħaqqad flimkien jista’ jkun passiv jew attiv, ipprogrammat jew awtoġenerattiv, iżda dak li jistga’ jikber jew jinbidel jitħalla jagħmel dan mingħajr aktar intervent mill-artist jew kontroll fuqu. Flimkien, il-ġabra tal-komponenti jiffurmaw pajżaġġ dinamiku u nnetwerkjat  fejn l-aġenti kollha, ħajjin jew le, ikollhom il-kapaċità li jaffettwaw lil xulxin, irrispettivament minn jekk ikunux qed jagħmlu dan b’mod konxju.

Exomind (Deep Water), 2017, issa tista’ tiġi skoperta fil-ġonna tal-Palazz Verdala, u hija parti minn grupp ta’ xogħlijiet żviluppati minn Huyghe fl-aħħar deċennju li jduru madwar mistoqsijiet li issa huma urġenti fl-iżvilupp tal-Intelliġenza Artifiċjali u r-relazzjoni umana magħha, kif ukoll postna fid-dinja: kemm aħna mxebilkin fl-inħawi ta’ madwarna? Nistgħu, jew għandna nikkunsidraw ukoll il-proċessi tal-ħsieb u l-esperjenzi tagħna bħala separati mill-ambjent tagħna? Bħal f’eżempji oħra tal-prattika ta’ Huyghe, dan ix-xogħol għandu l-kapaċità li jikber u jinbidel lil hinn mill-kontroll tal-artist. Dan jagħtina l-opportunità li nirriflettu fuq il-post tagħna fl-ekosistemi kumplessi tad-dinja b’mod li jista’ jagħti lok għal ripożizzjonament li ma jibqax aktar antropoċentriku. 

Exomind (Deep Water) ta’ Pierre Huyghe se tinkixef matul il-Ġimgħa Internazzjonali tal-Arti tal-MICAS u qed tiġi organizzata f’kollaborazzjoni mas-Serpentine Galleries, Londra, ir-Renju Unit.